top of page

Chapecoense a hunga nan promé wega despues di e aksidente aéreo.


Den fin di siman e ekipo brasileño Chapecoense a hunga nan promé wega for di despues di e aksidente aéreo ku a tuma lugá na fin di novèmber aña pasá. E aktua tim kampion na Brasil, Palmeiras tabata nan kontrinkante den e wega di fogeo. E partido a kaba den un empate na dos gol.

Chapecoense a haña inskripshon di 20 hungadó nobo na kuminsamentu di e luna aki. Den e siman aki nan ta hunga kontra Joinville den nan promé partido ofisial pa kompetensia. E kiper Jakson Follmann, defensa Alan Ruschel i defensa sentral Neto, ta e úniko hungadónan ku a sobrebibí e tragedia. Promé ku e wega di fogeo nan a subi kancha na e Arena Condá di Chapecoense i tabata hopi emoshoná. Tur famia di e hungadónan i miembronan di e staf tèkniko ku a pèrdè nan bida, tabata presente. Kiper Follmann mester a laga amputá un pia i ta sintá den un ròlstul. Entre tantu Ruschel i Neto por kana atrobe i tin chèns ku nan lo por djoin e ekipo mas despues.

Dia 28 di novèmber aña pasá e selekshon di Chapecoense tabata biahando pa nan partido den e final di e Copa Sudamericana kontra e tim kolombiano Atletico Nacional, ora nan avion a kai. Di e 77 okupantenan den e avion, seis persona so a sobrebibí e tragedia. Riba insistensia di Atletico Nacional, a duna Chapecoense e kopa di kampion tòg. Durante e wega di fogeo, Follmann a drenta stadion ku e kopa riba su skochi.

Pasó ta 71 persona a muri den e aksidente aéreo, e wega di fogeo a dura 71 minüt komo un muestra di onor pa e víktimanan.

bottom of page