Apenas algun ora despues di huramentá, Donald Trump a kuminsá ku kambionan.


Poko ratu despues ku Presidente di Estádos Unídos Donald Trump a huramentá, el a kuminsá ku diferente trámite pa kambia sierto leinan vigente. El a firma algun dokumento presidensial, entre otro proklamashon di Dia Nashonal di Patriotismo i algun nominashon formal pa su gabinete. 
Na e seremonia di su inougurashon, Trump a suspendé un regla ku tabata duna hende sierto benefisionan na momentu ku un hende kumpra un kas nobo na Merka. Na mes momentu Trump a publiká diferente "tweet" tambe. Entre otro el a riba loke el a bisa den su promé diskurso komo presidente, esta ku merikanonan a bolbe tuma poder di gobernashon. Trump a bisa ku e dia di inougurashon lo keda kòrda komo e dia ku "a trese gloria bek na Merka". E atministrashon di Trump mesora a hasi kambionan tambe riba e wepsait di Kas Blanku. E presidente nobo di Merka i su tim a komprometé pa eliminá leinan dañino i innesesario di e presidente anterior, Barack Obama. Entre otro Trump lo trese kambio den e plan di akshon pa klima i otro inisiativanan pa protekshon di klima. Den e promé òrdu ehekutivo Trump a indiká na agensianan di gobièrnu pa redusí e asina yamá "Affordable Care Act", mihó konosí komo ObamaCare, ku ta e pólisa pa a duna tur merikano kuido di un forma pagabel. Den oranan di mèrdia Trump a partisipá na un lùnch den Capitol ku tabata patrosiná pa Kongreso di Merka. Despues a sigui e proseshon presidensial i e parada di inougurashon na Pennsylvania Avenue, dilanti di Kas Blanku. Parti anochi Donald Trump i su famia a partisipá na varios fiesta di selebrashon ku a tuma lugá na Washington.