Gobièrnu ta kuminsá yuda InselAir ku 3 mion dòler.


Parlamentu di Kòrsou a aseptá un moshon pa gobièrnu yuda InselAir ku e situashon prekario ku e kompania di aviashon ta aden. Minister Eugene Rhuggenaath a splika ta trata di montante inisial di 3 mion dòler, ku lo ta mará na varios kondishon. Ta indiskutibel ku komunikashon aéreo ta importante pa komunidat di Kòrsou. Un konekshon aéreo entre islanan Aruba, Kòrsou, Boneiru, Sint Maarten Saba i St. Eustatius ta hopi importante pa mobilidat di pueblo pa mantenshon di relashonnan familiar, kultural, deportivo i komersial. E moshon ta indiká ku gobièrnu no por permití pa nos islanan keda aísla. InselAir a aserka gobièrnu di Kòrsou ku un petishon pa un sosten finansiero di forma temporal i urgente di 15 mion dòler. E kompania tin un montante supstansial di dòler pegá na Venezuela. InselAir ta un kompania priva ku tin un impakto soshal ekonómiko hopi grandi riba komunidat i ekonomia. E kompania ta empleá alrededor di 600 trahadó direkto i sòru pa 900 kupo di trabou indirekto. E kompania ta aportá entre 5 pa 10% di e produkto doméstiko brutu di Kòrsou. Mas aleu InselAir ta trese sigur 25% di turista Kòrsou. Basa riba e echonan aki gobièrnu a laga un komishon di eksperto studia e posibilidatnan pa trese proposishonnan pa garantisá e konekshon aéreo. E proposishon di e komishon ta enserá pa evitá ku e kompania ta deskontinuá operashon riba tèrmino korto i laga mas ku 600 hende desempleá i ademas esaki lo kousa tambe problema riba tereno di konekshon aéreo. Esaki lo nifiká un impakto negativo grandi riba ekonomia i turismo. E rekomendashonnan ta enserá ku gobièrnu mester haña partisipashon den supervishon i maneho di InselAir pa garantisá ku e yudansa na e kompania lo kondusí na un kompania sólido i ku perspektiva positivo riba tèrmino largu.