Djabièrnè awor Kòrsou tin un gobièrnu nobo.


Despues di su bishita na gobernador Lucille George-Wout, formadó Kenneth Gijsbertha a informá ku e ministernan nobo lo huramentá djabièrnè mainta 11or. Durante su bishita Gijsbertha a informá gobernador tokante akuerdo di gobernashon ku lidernan di partidonan MAN, PAR, PNP i PS a firma i e proseso di screening. Den e proseso aki institutonan manera Ministerio Públiko, Banko di Seguro Sosial, Inspektor di Impuesto, ‘Meldpunt Ongebruikelijke Transacties (MOT) tabata envolví. Awor ta falta algun aspekto atministrativo ku mester tuma lugá promé ku huramentá e gobièrnu nobo. E gobièrnu nobo lo ta formá pa : Hensley Koeiman komo Promé Minister i Minister di Asuntunan General. Kenneth Gijsbertha komo Minister di Finansas. Elsa Rozendal komo Minister di Enseñansa, Siensia, Kultura i Deporte. Zita Jesus-Leito komo Minister di Salubridat, Medio Ambiente i Naturalesa. Eugene Rhuggenaath komo Minister di Ekonomia. Susanne Camelia-Römer komo Minister di Tráfiko, Transporte i Planifikashon Urbano. Ornelio Martina komo Minister di Hustisia. Ruthmilda Larmonie-Cecilia komo Minister di Maneho, Planifikashon i Servisio. Jaime Cordoba komo Minister di Asuntunan Sosial, Trabou i Bienestar. Eunice Eisden komo Minister Plenipotensiario. Anthony Begina komo Minister Plenipotensiario Suplente.