Durante su presentashon na Parlamento, Minister Eugene Rhuggenaath a indiká ku gobièrnu ta den kombersashon ku un grupo chines ku tin interes pa kumpra Plaza Hotel den sentro di siudat. Minister Rhuggenaath a papia di e suma di 30 mion florin, ku e doño aktual ta pidi i ku pa gran parti ta destiná pa paga debe na kreditornan lokal i den eksterior. Sinembargo no ta muchu kla, si e bognan na Marichi tambe ta parti di dil, asina korant Extra ta raportá. Di otro banda Extra tin informashon tambe ku un grupo merikano tin interes pa kumpra Coral Cliff Hotel, ku aktualmente ta den man di famia De Freitas. E grupo merikano ta operadó di un dje hotelnan mas eksitoso na St.Maarten. Minister Rhuggenaath a splika ku gobièrnu ta na altura dje negosashonnan ku e grupo merikano i lo duna tur kooperashon nesesario. Ademas tin un grupo kolombiano ku ta den negosashon pa kumpra Kurá Hulanda na Otrobanda i tambe Kurá Hulanda Lodge na Playa Kalki. E grupo kolombiano aktualmente ta manehá un kadena impreshonante di hotel na Colombia i Sur Amérika.