Kòrsou tin un akuerdo di gobernashon nobo.


Kòrsou tin un akuerdo di gobernashon nobo, mientras ta pendiente ainda pa e ministernan ku lo bai implementá e plan, bira konosí. E ministernan no ta konosí ainda, debi ku e proseso di “screening” no a kaba ainda. Djaweps atardi na Plasa Himno i Bandera na Barber e partidonan MAN, PAR, PNP i PS a firma e akuerdo ofisial pa e próksimo kuater añanan di gobernashon. Un dje puntonan sentral den e akuerdo di gobernashon ku a haña e título “Dignidat Humano Ta Sentral”, ta e lucha pa kombatí kriminalidat. E gobièrnu nobo tin komo prioridat pa atendé ku ekonomia di Kòrsou i diferente área ku mester di atenshon urgente, manera entre otro enseñansa. Un dje puntonan den e akuerdo taa kon ta bai atendé ku e asina yamá Consensus Rijkswetten. Mientras ku ya ta konosí i probabel ku Hensley Koeiman lo bira e próksimo promé minister. Ta spera ku den e siman ku ta bini lo anunsiá ofisialmente ken lo okupá e puestonan di minister.