Asesino di zùster Christina Barry ta bai korte di kasashon.


E hòmber Arthur Hogesteger ku a asesiná su kasa zùster Christina Barry i ku a keda kondena na 24 aña di prison den korte di apelashon ta bai ku su kaso korte di Kasashon, asina su abogado mr.Janssen a konfirmá. Den korte di Kasashon lo revisá e kaso pa mira si korte di apelashon a tene kuenta i kumpli ku tur punto di e investigashon i si lei a keda apliká korektamente. Den promé instante e kaso a parse un kaso di atrako ku a terminá fatal pero despues di investigashon a bin resultá ku Hogesteger mes a asesiná su kasa ku 30 hinká di kuchú. Den korte di promé instansia Hogesteger a keda sentensia na 24 aña di prizon. E la apelá e sentensia i korte di apelashon a bolbe konfirmá esaki. Testigunan silensio ta esnan ku a kondusí na e kondena di Hogesteger. Den e okashonnan ku Hogesteger a duna un deklarashon, Korte a bisa ku su deklarashon tin hopi buraku i no ta kuadra ku e investigashon. Hogesteger a keda para riba su inosensia i bisa ku morto di su kasá tin’é traumatisá i p’esei e no por papia di e kaso. Korte di apelashon a konkluí ku Hogesteger a warda zùster Barry yega kas pa e asesin’é. Korte a splika tambe ku e orario ku e krímen a tuma luga ta kuadra eksaktamente ku e orario ku Hogesteger a plania pa otro hende asesiná su kasa. E konklushon di Korte ta ku Hogesteger a asesiná su kasa di forma premeditá.