Michelle Obama lo duna su último entrevista komo promé dama di Estádos Unídos, na Oprah Winfrey. Riba 18 di desèmber lo transmití e programa spesial ku e entrevista riba kanalnan di televishon Merikano. Den un komunikado Oprah Winfrey i e kanal di televishon CBS a informá ku e entrevista lo trata di bida den Kas Blanku. Loke ta pasa tras di kortina, eksperensianan komo promé dama i plannan pa futuro di e pareha presidensial. Michelle Obama a bisa ku e no tin ambishonnan polítiko. Djis despues Barack Obama tambe a pone énfasis ku Michelle no tin plan pa bai pa presidensia merikano. E pareha Obama tin un bon laso ku Oprah Winfrey. Durante e preelekshon na 2008, Winfrey a sostené na Obama. Segun un estudio di Columbia University den e aña ei, e sosten públiko di Oprah a sòru pa un mion voto èxtra pa Barack Obama.