Bill Gates i hefe di Alibaba ta hinka un bion dòler den energia limpi.


Eks direktor di Microsoft, Bill Gates i e hefe di Alibaba, Jack Ma, ta bai hinka huntu otro invershonistanan ún bion dòler den empresanan ku ta traha pa logra teknologianan pa energia nobo. Vários medio di prensa merikano a públika ku djaluna 12 di desèmber a lanta e fondo Breakthrough Energy Ventures pa realisashon di e projekto. E kapitalistanan di riesgo, John Doerr i Vinod Khosla ta enkargá ku e fondo, huntu ku direktor di Amazon, Jeff Bezos i fundadó di Virgin Richard Branson. "Nos meta ta pa konstruí empresanan, ku lo yuda ofresé energia konfiabel, pagabel i liber di polushon na e mundu pa e siguiente generashon," asina Gates a bisa den un deklarashon. Breakthrough Energy Ventures lo invertí únikamente na komienso di proyektonan, ku lo tin un efekto grandi riba kambio di klima. Nan mester por logra por lo ménos un redukshon di minimal mitar gigatonelada na emishon di gasnan di efekto invernadero. (broeikas) A lanta e fondo despues di elekshon di Donald Trump, ku ta un sképtiko di klima, komo presidente di Merka. Trump a skohe e prokuradó-general Scott Pruit di Oklahoma komo lider di e Agensia di Medio Ambiente EPA. Durante e periodo di gobièrnu di Obama, Pruit tabata kontra e maneho di klima di gobièrnu.