Trump ta haña rapòrt CIA riba hèkmentu ruso, ridíkulo.


Segun presidente elekto, Donald Trump, nada di e konklushonnan den un rapòrt di CIA, ku ta bisa ku Rusia a pidi yudansa di hèkdónan pa yud’é gana elekshon na Merka, no ta bèrdat. ''E ta ridíkulo. Ta un preteksto. Mi no ta kere nada di e kos ei,” asina Trump a deklará den wikènt, durante un entrevista ku Fox News. Segun Trump, e rapòrt ta un preteksto di e demókratanan despues di e derota elektoral di Hillary Clinton. "Tur siman tin un otro historia. Manera boso sa kaba, nos a logra un viktoria tremendo i devastador den elekshon." Di otro banda, miembronan di kongreso, tantu demókrata komo republikano, ke un investigashon profundo riba konklushon di e rapòrt. Den un deklarashon, e miembronan di kongreso di tur dos partido a señalá e metementu di Rusia den elekshon merikano, komo algu alarmante.

Segun fuentenan di Washington Post, CIA ta konkluí den e rapòrt nobo ku Rusia a mete den elekshon presidensial pa yuda Trump. Despues di e informe den Washington Post, Trump a laga sa, ku e no tin konfiansa den e konklushonnan di e servisionan di inteligensia. "Esakinan ta e mésun hendenan ku a bisa ku Saddam Hoessein tabatin armanan pa destrukshon masivo," Trump a reakshoná riba e notisia.