
Desaroyadó di weganan virtual EA a haña un gesto bunita pa den wega di futbòl via kòmputer, krea e posiblidat pa laga e hungadónan di un tim, hunga futbòl den koló di regenbog pa sostené e komunidat LGBT. E komunidat LGBT ta sali na interes di homoseksualnan. Sinembargo algun polítiko ruso no tabata di akuerdo. E kampaña lo ta violá leinan kontra propaganda pa LGBT na Rusia. Durante tres dia largu, por a buska shirtnan di LGBT grátis, komo parti di e akshon ‘Rainbow Laces’. Meta di e akshon ta pa redusí e odio ku tin kontra LGBT den futbòl. Segun miembronan di e partido komunista no por bin ku e akshon asina na Rusia. Nan a manda un karta pa e supervisornan, pa hasi algu na e propaganda pa LGBT. Esnan ku a skibi e karta ta bisa ku, dor ku FIFA 17 ta invitá úsuarionan pa sostené e akshon ‘Rainbow Laces’, e ta un kampaña masal pa sostené LGBT, asina e korant The Guardian ta raportá. Polítikonan ta bisa ku un kampaña asina no ta permití na Rusia. Na 2013 e pais a pasa un lei ku ta prohibí tipo di propaganda asina. Na Rusia e mandatarionan ta di opinion ku, relashonnan seksual no tradishonal por daña desaroyo i salú di muchanan. Segun polítiko Irina Rodnina, e wega pa tur edat, por ser prohibí na Rusia. Outoridatnan mester investigá si e wega tin mag di ser bendé pa e federashon ruso. Tur pais tin lei, na kua bo mester tene bo mes na dje. Un otro posibilidat ta ku por adaptá e wega òf e edat, segun Rodnina.