Obama a laga investigá atakenan sibernétiko durante elekshon na Merka.


Presidente Barack Obama, a duna enkargo na servisionan di inteligensia merikano, pa investigá atakenan sibernétiko i metementu strañero durante di elekshon ku a tuma lugá resientemente na Merka. Asina e agensia Reuters a informá. E servisionan sekreto mester produsí konklushonnan, promé ku Obama baha ofishalmente komo presidente. Entrante 20 di yanüari, Donald Trump lo asumí presidensia di Merka.

Konsehero di Seguridat Nashonal, Lisa Monaco, a bisa ku atakenan sibernétiko durante elekshon, no ta algu nobo, pero e biaha aki sí nan a pasa liña. Na 2008, Monaco tabata traha pa FBI i a mira kon China a infiltrá e sistemanan di Barack Obama, e tempu ei ainda, komo senador i tambe di John McCain, ku tambe tabata senador. Tur dos senador a hiba un kampaña pa presidensia i a haña notifikashon di e infiltrashon. "Meskos ku na 2008, nos a bolbe mira e aña aki aktividatnan sibernétiko malisioso den e sistema di elekshon,” asina Monica a deklará.

Merka a akusá Rusia na òktober di atakenan sibernétiko. Esakinan tabata dirigí riba e partido Demókrata i a tuma lugá djis promé ku elekshon presidensial na Merka. Presidente Obama a atvertí presidente ruso, Putin pa konsekuensha di e atakenan. Tempu Trump tabata kandidato presidensial ainda, el a reta Rusia, pa publiká e “e-mailnan” di Hillary Clinton ku tabata falta. Clinton tabata den e lucha pa presidensia. Ta trata di imeilnan di tempu ku Clinton tabata minister di Asuntunan Eksterior, bou di mandato di Obama.