Kandela a destruí dos pakus den Otrobanda.


Den mardugá di djaweps pa djabièrnè, dos pakus den Breedestraat Otrobanda a pega na kandela. No a sobra nada di e edifisionan den kuá tabatin e pakusnan di paña Kriss Kross i Favorite Shop. Masomenos 11or di anochi, e kandela a kuminsá den e pakusnan ku ta pegá ku Brionplein. Den kareda di 3.30or mardugá, bomberonan por a kanta “brandmeester”, loke ta nifiká ku nan a logra paga e kandela. Despues di esei a sigui ku spùitmentu ku awa, loke ta yama “nablussen”. Pa esaki a hasi uzo di kayonnan di awa. Den komienso, bomberonan tabatin difikultat pa kontrolá e kandela, debí ku e pakusnan tabata yen di paña. A logra evitá ku e kandela ta yega na e edifisionan bisiña.

Mester a evakuá e habitantenan na parti patras di e edifisionan ku a pega kandela. Por lo pronto nan no por regresá nan kasnan, debí na e huma ku akumulá dor di e kandela. Asina brandweerofficier Eric Martina, a deklará na medionan di komunikashon. E sekshon Komunikashon & Informashon di Ministerio di Asuntunan General ta pidi habitante i bishitantenan di Otrobanda pa evitá Kaya di Otrobanda, ya ku tin peliger ku e murayanan di e dos edifisionan lo por basha aden un ora pa otro.