Kòrsou a firma tratado di aviashon ku Bahamás.


A firma un tratado di aviashon ku Bahamás ku yama ‘Open sky policy’. Ta un maneho pa yega na akuerdo entre paisnan di manera ku por haña mas linea di aviashon na Kòrsou. Ministerio di VVRP di Minister Susy Camelia-Römer a firma e tratado. Den un próksimo bishita na Bahamás lo firma un tratado pa aviashon “Air Service Agreement”. Minister Camelia-Römer lo firma e tratado na nòmber di Reino Hulandes. Una bes esaki tuma lugá lo presentá e tratado na Konseho di Reino pa despues Parlamento di Kòrsou i Tweede Kamer na Hulanda duna aprobashon.

E akuerdo ku Bahamás ta unu “open sky”, kaminda paisnan ta liberalisá mas tantu posibel e operashon aéreo. Esei ta nifiká ku aerolineanan di Kòrsou por operá den direkshon Bahamás, via kualke punto di tránsito òf sigui pa kualke destinashon despues di sali for di Bahamás i vise vèrsa. Lo no tin restrikshon pa e kantidat di aerolinea òf ni frekuensia, kapasidat o tipo di operashon aéreo.

Den e último tres añanan Kòrsou a negoshá mas ku 30 akuerdo ku diferente pais pa krea mas posibilidat aéreo.