No a kondená polis na Merka, ku a mata hòmber pretu ku no tabata armá.


E hurado den e kaso di Walter Scott, no por a yega na un diktámen riba e pregunta: si e polis Michael Slager tabata kulpabel sí òf nò, na krímen òf asesinato. P’esei hues a deklará e kaso anulá. E hurado tabata konsistí di 11 hende blanku i 1 afro-amerikano. E hurado ku tabata sumamente dividí riba e pregunta, a deliberá kuater dia riba e kaso aki. Un di e miembronan di e hurado a mèldu serka e hues, ku segun su konsenshi, e no por deklará e agente polisial kulpabel di asesinato. P’esei e hurado no por a yega na un diktámen unánime, asina prensa na Merka a raportá.

E tiroteo a tuma lugá na aprel 2015 den estado Sùit Carolina. Slager a tira Scott, un hòmber pretu di 50 aña. El a tira e víktima den lomba, despues di a arest’é durante un kòntròl di tráfiko. Despues di a tira e hòmber, e polis a pone un “taser” (aparato ku ta dal koriente) banda e kurpa. Testigunan a filma e tiroteo i públika esaki, loke a resultá den hopi rabia i manifestashon. No ta e promé kaso den kuá un agente polisial blanku a uza forsa desproporshonal kontra un merikano pretu. Na yüni 2015, un hurado a disidí ku hustisia mester pèrsiguí Slager pa asesinato i opstrukshon di prosedimentu husdisial. Awor ku hues a deklará e kaso anulá, hustisia mester determiná kiko ta bai sosodé mas aleu. E kaso por bolbe bini dilante hues òf por keda resolvé. Un abogado di e famia di Scott, a laga sa mesora despues di e fayo den prosedimentu, ku nan ta bai eksigí pa bolbe demandá Michael Slager. "E lucha aki no a kaba ainda. Esaki ta djis e promé rònt,” segun e abogado den deklarashon pa e kanal ABC.

E prokuradó general ta sostené e punto di bista aki. "Hustisia ta poko slow, pero Slager lo no por skapa for dje,” segun bosero di e famia. E famiana di Scott a pidi e demostrantenan rabiá, pa den kaso di un eventual protesta, laga esaki sosodé pasífikamente.