Aqualectra ke baha 180 empleado den próksimo 5 aña.


Un dokumento di gerensia di Aqualectra ku a bai pa gobièrnu aprobá ta indiká ku 180 empleado mester bai kas. E forma ku esaki mester sosodé ta pa laga empleadonan aktual baha for di awor te ku aña 2021 ku 60 aña en bes di 65. E kompania tin diferente reto i oumento di efisiensia i efektividat ta importante pa por enfrentá e retonan. Kapital humano ta un di e retonan importante i esfuersonan pa oumentá efisiensia lo resultá den redukshon di empleado den diferente área di e kompania. Sinembargo implementashon di teknologia nobo den Aqualectra ta rekerí tambe, mas konosementu di parti di e personal. Hunta di supervishon di e direktornan a pidi gerensia pa presentá un plan di redukshon di empleado basá riba oumento di efisiensia i un bahada den gastunan di personal. Gerensia di Aqualectra tin diferente opshon pa por enfrentá e retonan en kuestion. E promé opshon ta opta pa no tuma medida i laga empleado yega edat di 65 aña i baha ku penshun. Un otro opshon ta pa laga e empleado baha ku penshun ku 60 aña i di tres opshon ta retiro di empleado. Segun análisis e mihó opshon ta pa e empleado bandoná e kompania ku penshun ya ku esaki lo baha gastu di personal sin ku e ta trese gastu debí na retiro di personal. Pero debí na kambionan den lei di penshun na aña 2013, e opshon ei ta unu difísil pa implementá sin ku e resultá den gastunan adishonal pa e kompania. E lei di penshun ta afektá e empleado den su entrada neto i p’esei no ta interesante pa e empleado baha ku penshun bou di e kondishonnan ei. Otro opshon ta ku e surplus di personal mester bai kas di forma obligatorio. Esaki lo kosta e kompania di awor te aña 2021, masomenos 61 mion florin pa 180 trahadó. Un di dos opshon ta baha personal ku 60 aña for di awor te ku aña 2021 i esaki lo nifiká un gastu di 23 mion florin. Pa e empleado mes, esaki lo nifiká ménos entrada si nan baha ku 60 aña, pero tambe ménos gastu pa Aqualectra. Si opta pa no hasi nada e gastunan pa Aqualectra lo suma yega 80 mion.