InselAir tin ku retirá personal, debi na situashon delikado dje kompania.


Den un komunikado InselAir a partisipá ku nan tin ku kita hende for di trabou, debi na e situashon delikado dje kompania. E kambionan riba merkado a obligá InselAir na hasi adaptashon den su organisashon i operashon. E kambionan ta nesesario pa mantené un organisashon saludabel pa asina por kumpli ku e ròl ku InselAir tin, entre otro pa ku ekonomia di Kòrsou. E kompania ta trese míles di turista tur aña pa e islanan ABC. Ademas ta duna trabou direkto na sentenáres di persona i indirekto na miles. Último lunanan InselAir a logra ku eksito pa kompensá gran parti di e redukshon (di 35% pa 4%) de demanda for di e merkado di Venezuela. A agregá ruta i destinashon nobo, manera, Port of Spain, Barranquilla, Georgetown, Manaus, Havana, San Juan i Quito. Adishonal InselAir a subi e frekuensha di buelo pa Paramaribo, Port au Prince i Santo Domingo. CEO di InselAir, Albert Kluyver a bisa : “Tabata un reto pa kompensá e pèrdida aki i nos a realisá ku nos mester aseptá i restrukturá nos organisashon rondó di e realidat nobo aki.” Kluyver a sigui bisa ku pa e parti di operashon ku no por kompensá, lo mester baha gastunan. Pa e motibu aki mester a evaluá tur parti den e organisashon, manera finansa, e parti operashonal, komersial, asuntunan general i mantenshon pa asina por baha gastu. Redukshon di aktividatnan operashonal ta nifiká ku InselAir mester redusí su gastunan i tambe e kantidat di empleado ku tabata nesesario den e operashon anterior. Por operá ku un grupo di empleado mas chikí. Pa logra esaki InselAir lo reorganisá su forsa laboral dor di kombiná posishonnan, eliminá sierto departamentu i /òf kambia empleadonan di departamentu. Pa empleado ku e kompania no por garantisá un posishon den e struktura nobo, lamentablemente lo terminá nan akuerdo di empleo. Lo sostené e grupo aki den nan búskeda di un posishon den otro organisashon. E kompania ta haña hopi lamentabel ku mester a yega na e desishon, pero e pasonan ta nesesario pa sigurá InselAir su posishon den “Pan American skies” i pa krea un organisashon stabil i finansieramente saludabel i sólido. E akshonnan ku a implementá resientemente, ya a kuminsá duna resultado den mehoransa di e “on-time performance” di e kompania.