A detené dos hòmber mas pa nan envolvimentu den e kaso di dòbel asesinato ku a tuma lugá den klup The Alley dia 3 di sèptèmber último. A detené un hòmber R.C. de J. di 30 aña den oranan di djasabra mardugá i dia 20 di òktober a detené C.S.M, pero ta den e siman aki polis a hasi anunsio ofisial di nan detenshon pa nan envolvimentu den asesinato di Jurick Hooi di 20 aña i Karoushhaney Martina di 22 aña. Ámbos hòmber ta detené riba enkargo di fiskal ouksilario. Esaki ta hasi e kantidat di persona detené en konekshon ku e dòbel asesinato, sinku. E dama Romainy C. i e hòmbernan Dhanursho F. i Dudmar L. resientemente a keda presentá dilanti di un hues. Sinembargo ainda e investigashon den e kaso no ta kla. E próksimo tratamentu di e kaso ta planeá pa 23 di febrüari próksimo i tratamentu di e kaso den kontenido ta programá pa dia 12 di mei. Segun fuentenan e dama C. ta pareha di e hòmber De J. E dama Romainy C. lo a hinka e arma di kandela di De J. kargá den su kartera i a drenta e klup kuné riba e anochi ei. F. tabata e bewaker ku a permití e persona ku e arma di kandela drenta. E sospechoso prinsipal Cristefer Martina alias Crisje òf Cris ta sospechá di ta esun ku a tira riba e víktimanan.