Despues ku promé minister Matteo Renzi a pèrdè e referéndum italiano, e balor di euro a baha drastikamente riba merkado asiátiko. Euro a baha 1.3 porshento te na un balor di 1.0505 dòler. E derota di Renzi den referéndum a sòru pa hopi inkietut riba merkadonan finansiero. Despues di e resultado, e promé minister a anunsiá su retiro tambe.
E intrankilidat ta bin na un mal momentu pa e sistema bankario frágil ku tin na Italia. E di tres proveedor di krédito mas grandi na Italia, Banko Monte dei Paschi di Siena, tin’é hopi pisá aktualmente. E banko mester akumulá 5 bion euro, promé ku fin di 2016, pa por evitá problema grandi. Di otro un banda, otro desaroyo ku a aktivá e merkado finansiero ta ku Alexander Van der Bellen a gana elekshonnan presidensial na Oustria.