Kontroversial tuberia no a haña pèrmit pa pasa riba teritorio indjan den Nòrt Dakota.


Gobièrnu merikano no a haña pèrmit pa un ruta kontroversial tuberia ku ta planiá pa pasa dor di Nòrt Dakota. E desishon ta remarkabel i un tremendo viktoria pa aktivistanan di medio ambiente i e indjannan, ku a protestá pa simannan largu kontra instalashon di e tuberia. E kontroversial instalashon, di kasi 2.000 kilometer di largura, lo kosta 3.7 bion dòler. E pipanan, ku mester transportá 50.000 barí di petróleo diariamente, ta pasa entre otro den un teritorio kaminda tin indjannan Sioux ta biba. Nan ta teme ku e tuberia lo por tin lèkmentu i asina kontaminá nan awa di bebe. Ademas e pipanan ta un menasa pa e teritorio di naturalesa protehá i nan lo pasa tambe den lugánan sagrado pa e indjannan. Sentenáres di aktivistanan a desafiá e friu enorme di Nòrt Dakota tur dia, pa demostrá nan disgustu. Polis a aktua ku man fuerte kontra e demsotrantenan, entre otro a uza kañon di awa kontra nan. "Awor nos mester eksplorá otro opshon pa e pipanan,” asina un bosero di e kuerpo di ingenieronan di ehérsito merikano a bisa. For di basta tempu, gobièrnu di Obama a insistí serka e konstruktornan di e tuberia, pa konsiderá un mihó investigashon i pa bini ku rutanan alternativo. Pero no a duna oído na esaki. E demostrantenan a eksigí pa tin un desishon di gobièrnu pa mas tardá meimei di yanüari 2017, na momentu ku Donald Trump sinta komo presidente. Ta konosí ku Trump ta na fabor di tipo di proyektonan asina i lo duna su aprobashon sigur pa konstrukshon di e tubería, manera e ta planiá awor. Ademas ta resultá ku e tin relashonnan estrecho ku e kompania di konstrukshon, segun The Guardian.

E pipanan ta pasa dor di Nòrt Dakota via Illinois bai e kosta sùit di Merka. Instalashon di e tuberia a keda retrasá for di sèptèmber 2016. Gobièrnu merikano a primintí pa bolbe revisá e pèrmitnan pa konstrukshon den e teritorio di e indjannan.