Resultado di referèndum na Italia ta krea tenshon den Union Oropeo.


E promé minister italiano Matteo Renzi a anunsiá ku e lo renunsiá, despues ku masomenos 60% di e pueblo italiano a rechasá e ideanan di Renzi, den referèndum. Renzi kier a trese kambionan fundamental na e konstitushon di Italia. Den un promé reakshon, Renzi a indiká ku awor opositornan lo mester bini ku alternativanan. Un di e kambionan mas fundamental, ku e kier a trese, ta pa limitá poder di Parlamento i mandatarionan regional. Resultado di e refèrendum tabata mará tambe na futuro di e promé minister. Asina urnanan a sera, ya tabatin indikashon ku 60% di e poblashon a vota nò. 69% di italianonan a hasi uso di nan derechi di voto, loke ta ser konsiderá komo un asistensia hopi haltu. Ta teme ku e resultado di referèndum na Italia tin reperkushon pa Union Oporeo. Kaida di gobièrnu na Italia lo krea instabilidat politiko i tenshon ekonomiko den Oropa. Esaki debí ku tin varios banko italiano ku ta den problema pa basta tempu kaba. Segun NOS e tenshon riba merkadonan finansiero na Oropa lo oumentá den e dianan ku ta sigui. Djaluna promé minister Matteo Renzi lo mester entrega su retiro. Lo mester determiná e or’ei si ta bin elekshon nobo Italia o ta bin un kabinete di eksperto. Renzi, ku ta un sosial demókrata, ta promé minister di Italia for di 2014.