Partidonan na Ulanda a yega na akuerdo pa konmemorá sklabitut.


E Instituto Nashonal di Sklabitut Ulandes, NiNsee i e Movementu di Resistensha Nashonal ’Zeg Neen Tegen Het NiNsee’ a yega na un akuerdo pa otro aña bolbe konmemorá sklabitut riba promé di yüli. Esaki ta e fecha riba kua sklabitut a yega na su fin 1863. E aña aki a stroba e konmemorashon ku protesta di hendenan ku no tabata di akuerdo ku a kambia e fecha for di 30 di yüni.

Debí di e protestanan persistente, yen di dezòrdu, di desena di surnameño i antiano, e konmemorashon a kuminsá hopi mas lat i mester a par’é tambe pa un ratu. Ta te ora e alkalde di Amsterdam Van der Laan i èks-futbolista Clarence Seedorf a intervení a bira un poko mas trankil. Na final e partidonan a palabrá ku lo papia riba e kontenido pa 2017. Van der Laan i Seedorf a primintí di kolaborá.

A yega na e akuerdo ku dia 30 di yüni lo bira un Dia di Reflekshon Nashonal, riba kua entre otro lo limpia e Monumentu di Sklabitut den Oosterpark spiritualmente. Pa meianochi, e Dia di Reflekshon Nashonal lo pasa drenta den e Konmemorashon Nashonal i Selebrashon na e monumentu di sklabitut. E akuerdo ku a yega na dje ta bálido solamente pa 2017. Kon lo sigui despues no ta muchu kla ainda. Tur dos partido ke usa e tempu pa buska solushonnan nobo. E presidente di e Movementu di Resistensha Nashonal ta satisfecho ku e akuerdo.