Kòrsou tin e mihó pista di drèg den karibe, segun Curaçao Extreme Fundation. Segun e fundashon esaki ta debí na e mihó tempunan ku motosiklista i outomoblistanan a kore riba e pista. E fundashon ta kere ku e hecho akí, ta duna un kontribushon importante na mas publisidat i rekonosementu di Kòrsou den eksterior. Proksimamente ta bai tin e di dos edishon di Curaçao International Extreme Finals (CIEF), ku ta tuma lugá riba e promé tres dianan di desèmber 2016. Durante e kompetensia, e mihó outo i markanan di motor ta sali kontra otro pa un presentá karedanan elektrisante. Lamentabel ku e outonan ku mester a bini for di Merka, no a yega. E úniko outo ku a yega ku transporte speshal ta e Super Scion, for di Aruba. Si tin un kantidat di outo i motosaikel for di Puerto Rico, Aruba i Boneiru. E aña aki tambe, e “top tuners” for di Merka lo tei presente, pa purba kibra e rèkert di 6,90 sekònde. Na e momentu aki, e rèkert ta riba nòmber di Jayson Angela di “Still Balling Racing” ku Ronnie Mitchell komo “tuner”. Riba e dianan lo tin tambe un kompetensia di mucha. E asina yamá “Junior Dragsters” tambe lo kompetí.