Na Mèksiko polis a bolbe haña hopi kadaver.


Polis di Mèksiko a bolbe deskubrí diesdos kadaver den e siudat Zitlala, den estado federal Guerrero. Guerrero tin mal fama debí na hopi violensia pa motibu di droga. Den e dianan tras di lomba den besindario di Tixtla a haña nuebe hòmber dekapitá. Nan kurpa sin bida tabata mustra señal di tortura. Na Teloloapan, masomenos 180 kilometer mas leu, a deskubrí tres víktima. Despues a bolbe haña shete kadaver i algun dia despues sinku mas.

Na Guerrero, kartelnan di droga, entre nan mes, ta den un guera pa e rutanan di kontrabanda pa entre otro heroina i kokaina. Na 2014, den e estado ei mes, un total di 43 studiante a disparsé bou di sirkunstanshanan misterioso.