Ehérsito di Salbashon (Salvation’s Army) a pone 568 kama disponibel pa repartí den hinter Ulanda. Ehérsito di Salbashon a pone e kamanan na disposishon di hendenan daklos, ku mester di un kaminda pa drumi debí na wer friu. Prinispalmente den siudatnan grandi a pone èkstra kapasidat pa risibí daklosnan durante e nochinan ekstremadamente friu ku ta drentando. Asina a entregá 200 kama den Amsterdam i 195 na Rotterdam. Pero entre otro tambe na Flevoland i Overijssel ku a hasi un apelashon riba e organisashon pa yudansa. Den sitionan mas chikí, ta pone e kamanan èkstra den lugánan di refugio eksistente. Den statnan grandi manera Amsterdam i Rotterdam a habri algun lugá speshal pa motibu di friu.
E kuater siudatnan grandi a anunsiá e kantidatnan èkstra pa daklos en konekshon ku e kresiente wer friu. Na Amsterdam e refugionan a habri dos dia promé ku tabata planiá. Normalmente ku friu òf nò, e refugionan ta habri di promé di desèmber te promé di aprel.
E areglo di kuido durante invierno, ta konta ora ku pafó, durante e periodo indiká ta eksistí peliger pa kongelamentu. GGD na Amsterdam, Utrecht, Rotterdam i Den Haag ta disidí huntu ku otronan, ki ora ta demasiado friu pa por drumi pafó. “Den kada munisipio ta diferensiá, for di unda ta trese e èkstra kamanan. Asina por ehèmpel Utrecht ta haña algun kama di Ehérsito di Salbashon, pero e munisipio ta traha tambe ku otro organisashonnan ku ta sòru pa kama,” segun un bosero di Ehérsito di Salbashon. Entretantu na Ulanda tur munisipio ta registrando kaba temperaturanan bou di sero grado Celsius.