VVRP ta bin ku maneho nobo di mobilidat pa ku Transporte Públiko.


Ministerio di Tráfiko, Transporte i Planifikashon Urbano, ta desaroyá un maneho nobo di mobilidat, pa bùsnan di ABC (konvoi) por pasa e rutanan riba kaminda grandi, mièntras e konvoinan chikí lo drenta mas den e barionan. Den e plan nobo ta involví tur partner, pues shoufùrnan di bùs chikí tambe. Ta e intenshon pa bin un kooperashon entre ABC i shoufùrnan di bùs. Den e maneho ta wak tambe pa tin mihó aksesibilidat den barionan nobo ku a bini aserka. Lo konstruí mas stashon chikí, kaminda tantu konvoi grandi komo chikí por para. Nos transporte públiko ta defisiente i mester yega na un situashon, kaminda hende ta haña agradabel pa uza transporte públiko i ta skohe pa de bes en kuando, laga nan vehíkulo na kas. Awor aki, transporte públiko tei solamente pa esnan ku no por pèrmití nan mes e luho di kumpra un outo.

“Pronto lo bini un kongreso riba e tema aki,” asina Suzanne Camelia-Römer (PNP) a bisa den Staten. Kompania di transporte públiko ABC ta haña un supsidio annual di 9.4 mion florin i ta generá nan propio entrada tambe. Ku e entradanan aki por kumpra mas konvoi nobo, segun Minister Camelia-Römer.