
Presidente Barack Obama lo no asistí na entiero di e lider kubano Fidel Castro. E vise presidente di Merka, Joe Biden tampoko lo no tei presente na e akto ku lo tuma lugá djadumingu 4 di desèmber próksimo. E relashon entre Merka i Cuba a mehorá bou di presidensia di Barack Obama. Na mart di aña akí, Obama a bishitá Cuba, kaminda el a topa ku e aktual Presidente Raul Castro. Durante su bishita, Obama no a topa ku Fidel Castro, ku a fayesé djabièrnè pasá na edat di 90 aña.
E Presidente ruso Vladimir Putin, tampoko lo no tei presente na entiero di Castro. Na su lugá, e Presidente di Parlamento ruso, Vjatsleslav Volodin lo representá e pais. Promé Minister di Canada, Justin Trudeau tampoko lo no tei na Santa Ifigenia, kaminda lo hiba shinishi di Fidel Castro su último lugá di sosiego.
Siman a habri ku míles di kubano ku a bishita Havana pa rindi último homenahe na "El Comandante". Nan tabatin bandera di Cuba i bòrchinan ku ta bisa "Ami ta Fidel". E multitut ku a reuní na Plasa di Revolushon tabata grita : "Biba Fidel. Nos ta skuché. Nos ta sinti'é. E ta akí pa semper." Gobièrnu di Cuba a invitá hinter pueblo pa bin e homenahe na Fidel, ku lo dura dos dia. E seremonia a kuminsá djaluna mainta ku 21 tiru di kañon komo saludo.
Sientífikonan a saka afo, ku e púpilonan di wowo di hende ta reakshoná riba músika. E forma di e púpilo ta kambia segun e slanan di müzik ta bai mas lihé o poko poko.