Minister Eugene Rhuggenaath ta preokupá ku entre otro e situashon finasiero delikado di Inselair. Su preokupashon ta trata e siguiente puntonan. E gòlpi pa ekonomia di Kòrsou den kaso ku Inselair bati bankarota. Inselair ta aportá ku 5.1% na e produkto bruto interno direkto di pais i algu ménos indirektamente. Según un estudio ku Inselair a hasi den pasado, nan tabatin 716 empleado i ta krea mas ku 900 kupo di trabou indirekto. Turismo via di Inselair a gasta 250 mion florin na 2014. Den e kaso ku Inselair no tei mas i otro kompania(nan) internashonal remplasá Inselair, Kòrsou lo pèrdè un kontribushon di 3.8% sin papia mes di e pèrdida di kuponan di trabou. Ademas lo pèrdè tambe 3.2. mion florin ku Ontvanger lo keda sin haña i 6.4 mion na SVB. No por deskartá tampoko ku den un situashon asina, tarifanan lo subi di forma konsiderabel, partikularmente relashoná ku buelonan pa entre otro Miami. Esaki debí na falta di preisnan kompetitivo ku Inselair si ta duna aworaki riba e ruta. Inselair últimamente a bati bèl i a aserká gobièrnu pa yuda den nan situashon alarmante.