Pilotonan di Lufthansa ta rechasá proposishon laboral nobo.


Pilotonan di Lufthansa a rechasá un proposishon pa un CAO nobo ku e kompania di aviashon aleman Lufthansa. E konflikto entre Lufthansa i e sindikato di pilotononan, ta eksistí pa mas di 2 aña kaba. For di 2014 nan a tene 13 wèlga kaba. E último wèlga tabata na sèptèmber 2015. Aparte di e salario, tin entre otro diferensia di opinion tokante penshun i plannan di kresementu pa ku e kompania di aviashon. Carsten Spohr, un funshonario haltu dje kompania a bisa ku Lufthansa ta keda para riba su punto. Si e kompania duna oído na e eksigensia pa oumento di salario, pa e profeshon mihó pagá den e empresa, segun e lo trese futuro di e kompania di aviashon den peliger. Kompetensia fuerte ta hasi ekonomisashon nesesario, segun deklarashon di Spohr na agensia di prensa Bloomberg.

Lufthansa a ofresé un oumento di suèldo, a kambio di sierto konseshonnan, rondó di por ehèmpel penshun. E oferta sin embargo a keda rechasá mesora dor di e sindikato di pilotonan, Vereinigung Cockpit (VC). Segun e sindikato, e proposishon no ta ofresé nada nobo. Lufthansa i e pilotonan, a trata pa áños pa yega na un bon palabrashonnan laboral. E pilotonan a wèlga for di djarason. P’esei a kanselá mas ku 2.600 buelo i hopi míles di pasahero a keda perhudiká. Den fin di siman 137 buelo a kai afó.

Ta trata prinsipalmente di buelonan den Alemania i Europa. Lufthansa a purba via di korte pa hues pone un prohibishon na e wèlga, pero kontrali na esaki, e sindikato a haña pèrmit pa sigui ku nan akshonnan. Ta kalkulá ku masomenos 315.000 pasahero a sinti efekto direkto dje wèlga.