Dòkternan di kas ta prekupá ku aspektonan di hòspital nobo.


Dòkternan di kas ta hopi preokupá riba e kapasidat di Hòspital Nobo Otrobanda (HNO). E hòspital nobo tin ménos kapasidat ku ta nesesario i esaki naturalmente lo tin infuensha riba kon ta bai ofresé kuido, asina e dòkter di kas, Rob Meijer, a bisa. Meijer ta tambe sekretario di Asosiashon di Dòkternan di kas na Kòrsou (Curacaose Huisartsen Vereniging CHV). Dòkter Rob Meijer ta indiká ku debí na esaki, lo trata e pashènt di forma despachá, loke lo hasi durashon di estadia den e hòspital nobo mas kòrtiku posibel. Esaki ta nifiká tambe ku servisio i demanda pa kuido paden i pafó di hospital mester ta riba un liña.

E punto di mas preokupashon pa e dòkternan di kas ta di atmishon i salimentu di pashèntnan den Hòspital Nobo Otrobanda. Dòkternan di kas i nan koleganan mester bai wak muchu mas mihó via kua ruta ta bai interná pashèntnan. Si tin ku manda pashèntnan kas mas lihé, e pashènt lo tin mester di mas tempu pa revalidá pafó di hospital. E kuido despues di sali for di hospital, mester ta prepará delantá. Pues mester bini klaridat riba e puntonan aki.

Pa loke ta trata revalidashon, mester bin ku proseduranan kon ta hasi ora e pashènt sali for di hospital. Segun Meijer, esaki no ta konta solamente pa kuido ku dòkternan di kas ta ofresé. Lo mester wak e asuntu di kuido na kas i e funshon di e kasnan di kuido di un forma diferente. Kuido pafó di hòspital ta enserá asistensia médiko den bario (wijkverzorging) i e kuido den kasnan di kuido (verpleeghuizen)

Riba e pregunta di CHV na HNO, kiko i kon e maneho di atmishon i salimentu di pashèntnan na HNO ta, nan no a haña un kontesta konkreto ainda. Direktiva di HNO, Inspekshon di Salú Públiko i e Federashon pa Institutonan di Kuido a kuminsá un konsulta ku CHV, pero esaki no a produsí nada. E responsabilidat di gobièrnu aki klaramente ta evidente i eminente. CHV ta dispuesto pa yuda ku konseho i proposishonnan na bienestar di tur pashènt pa ku kuido en general.