Trump a anunsiá kambionan ku e lo introdusí asina e sinta komo presidente.


Donald Trump ke pa riba e dia ku e asumí presidensia, Merka retirá mesora for di e Tratado di Asosiashon Trans Pasífiko (abreviashon ingles TPP). Esei ta loke Trump a bisa den un video, den kuá e ta anunsiá su akshonnan pa e promé 100 dianan ku el lo sirbi komo presidente. Durante su kampaña ya Trump a bisa, ku e ke sali for di e akuerdo di komèrsio liber. Segun Trump, e akuerdo ta kousa pèrdida di kuponan di trabou i ta un desaster pa Merka. "Na lugá di TPP, nos lo mester sera akuerdonan honesto di komèrsio, ku ta sòru pa kuponan di trabou pa merikanonan i ku ta bon pa nos industrianan," asina e presidente elekto a bisa. Na e Tratado di Asosiashon Trans Pasífiko, tin hopi pais involví, manera Oustralia, Canada, Hapon, Malasia, Perú i Nueva-Zeelandia. Den un reakshon, e presidente hapones, Shinzo Abe, a bisa ku e akuerdo komersial lo no tin sentido sin Estadonan Uní di Merka. Tambe Trump ke laga hasi un investigashon riba e maluso di e programa aktual di visa. E ke eliminá algun limitashon pa produkshon di energia, entre otro pa zeta di mineral di klei, gas i karbon. Trump ke introdusí tambe, ku pa kada regla nobo ta kita dos regla poné anteriormente. Dia 20 di yanüari 2017 ta inougurá Trump ku di 45 presidente di Merka.