Klinsmann ta retirá komo direktor tékniko di Merka.


Jurgen Klinsmann a haña su retiru komo ‘coach’ di e tim di fútbòl di Merka. E èks tòp futbolista profeshonal, mester bai pa motibu di e resultadonan ménos eksitoso den e partidonan pa kualifikashon pa e mundial di fútbòl 2018. Klinsmann tabatin e trabou for di 2011 serka e federashon merikano. E no tabata solamente ‘coach’, sino tambe direktor tékniko tambe. Bou di liderazgo di e aleman, e selekshon di Merka a pasa den un bon desaroyo, ora ku na 2012, Merka a gana diesdos partido tras di otro.

Durante kualifikashon pa e siguiente kampionato mundial, kosnan ta bai malu. E promé dos partidonan tabata un derota pa Merka. Dia 16 di novèmber último, Costa Rica a gana 4-0 di e pais, loke a hasi e soño pa yega mundial mas skur pa Merka. "Nos tin konfiansa, ku nos tin e kalidat korekto pa mundial, pa motibu di kresementu di nos hungadónan, pero nos ta konvensí ku mester skohe un otro rumbo,” asina presidente di e federashon merikano, Sunil Gulati a deklará.