Selebrashon di Dia di Mucha na Kòrsou, tabata un éksito.


Apesar di e áwaseru fuerte ku a kai, hopi hende a akudí den fin di siman, na e di sinku edishon di Feria Internashonal (Internationale Bazaar) den Fort Amsterdam. Fundashon Uniting for Children Curaçao (UCC) ta organisá e feria aki kada dos òf tres aña, den kuadro di Dia Internashonal di Mucha. E fundashon a keda lantá na 2001 dor di Direktorado di Relashonnan Eksterior (Directie Buitenlandse Betrekkingen (IBB) i e Kuerpo di Konsulnan na Kòrsou (Corps Consulaire Curaçao (CCC). Fundadó i miembro di direktiva di UCC, Lucita Moenir Alam, ta bisa ku áwaseru no por a stroba e alegria. ”Maske hopi hende tabata teme ku debí na e molèster di awa na Aruba e asistensia lo tabata abou, hendenan a bin na gran kantidat, ku nan paraplü òf nò”, segun Moenir Alam.

Despues di e diskurso di apertura di e defensor di e feria, gobernadó Lucille George-Wout, e programa por a kuminsá ku un presentashon kultural, den forma di baile folklóriko, poesia i mariachi. Tur grupo tabata presente. Na tur diesnuebe pais tabata representá ku stèntnan di kos dushi di kada pais. Entre otro “Onion Soup” di Ulanda, “Tandoori Chicken” di India i balchi di Suesia. Tabata un dia kaminda personal di konsuladonan tabatin e oportunidat pa topa otro den un ambiente multikultural. E konsul di e paisnan partispante presente tabata entr otro, konsulnan di Bélgika, Venezuela, Repúblika Dominikana, Alemania, Fransia, India, Italia, Libanon, Ulanda, Oustria, Spaña, Reino Uní, Irlandia, Estadonan Uní di Merka, China i Suisa.

E fondonan ku a rekoudá durante e Feria Internashonal ta bai pa GreenKidz, Prins Bernhardschool i Encilia, ku ta un fundashon ku ta traha na bienestar di muchanan maltratá.