Gobièrnu di Kòrsou, representá pa Minister Presidente Dr.Ben Whiteman, huntu ku Refineria di Kòrsou N.V. (RdK), representá pa su direktor señor José van den Wall Arnemann, a firma un ‘Heads of Agreement’ ku e kompanianan Guangdong Zhenrong Energy Co.Ltd (GZE) i China Zhenrong Holding Limited (CZR), tur dos representá pa señor Chen Bingyan. Ya gobièrnu di Kòrsou tin un Memorandum of Understanding (MoU) firmá ku GZE. CZR ta e un kompania ku GZE lo lanta na Kòrsou pa ehekutá e trabounan ku ta surgi for di e kontratonan final. E meta di e ‘Heads of Agreement’ ta pa GZE invertí den modernisashon i upgrading di e refineria i Curaçao Refinery Utilities (CRU) di forma ku esakinan por kumpli ku e normanan medioambiental internashonal di mas haltu ku den futuro e partidonan lo firma ku otro.
E MoU ku Gobièrnu di Kòrsou a firma riba 15 di sèptèmber ku e kompania Guangdong Zhenrong Energy Co. Ltd. tabatin un durashon di 2 luna, ku posibilidat di ekstenshon ku 2 luna mas. Den 2 luna partidonan a logra di yega na e ‘Heads of Agreement’, den kua ta deliniá e kuadro di tur e loke lo bai negoshá den e próksimo lunanan, pa yega na un kontrato di hür nobo, ku lo remplasá esun eksistente. A base di e kontrato definitivo ei, GZE lo tin e responsabilidat pa operá e refineria i e terminal di petrolio na Bullenbaai. E deadline pa GZE yega na un kontrato di hür definitivo ku RdK ta aki kasi un aña, esta 15 di novèmber 2017.
Awor ku a firma e ‘Heads of Agreement’, GZE tin 28 dia pa entregá un ‘Letter of Intent’ di un banko di bon reputashon komo prueba ku GZE ta finansieramente viabel. Un otro fecha importante ta 30 di aprel 2017, ya ku esaki ta e deadline pa GZE entregá e promé konsepto di su plan tékniko di proyekto.