CARICOM ta mònitor elekshon na Haiti.


Komunidat Karibense (The Caribbean Community (CARICOM) lo vigilá elekshon presidensial na Haiti. A reprogramá e elekshon pa djadumingu 20 di novèmber 2016. Inisialmente elekshon na Haiti mester a tuma lugá riba 9 di òktober 2016, pero a keda reprogramá esaki debí na pasashi di orkan Matthew. E orkan a laga hopi morto i destrukshon atrás na Haiti. Dr.Steve Surujbally, presidente di Komishon Elektoral di Guyana a dirigí e mishon, riba petishon di Minister di Asuntunan pa Eksterior di Haiti, Pierrot Délienne. E otro miembronan di e mishon tin inkluí ekspertonan den maneho elektoral for di Antigua & Barbuda, The Bahamas, Barbados, Dominica, Jamaica i Trinidad & Tobago. Den e mishon tin tambe un staf di sosten for di sekretariado di CARICOM. Miéntras tantu, e Organisashon di Estadonan Merikano (Organization of American States Electoral Observation Mission (OAS/EOM) na Haiti a kompletá nan rekorido rònt Haiti. Un tim di 130 eksperto i opservadó di 24 nashonalidat, bou di guia di e anterior senador di Uruguay, Juan Raúl Ferreira, lo opservá e elekshon den tur dies departamentu di Haiti. E mishon ta inkluí speshalistanan ku ta analisá den profundidat e aspektonan mas importante di e proseso elektoral, inkluso organisashon i teknologia elektoral, registrashon elektoral, hustisia elektoral i partisipashon di hende muhé. Dia di elekshon mes OAS lo opservá e proseso for di ora urnanan habri te ora e konteo di votonan kaba. Un tim lo keda den e pais te ora ku e proseso di formalisashon di tur informashon di e elekshon na Haiti finalisá.