Na Spaña 67% di e pueblo ta mira korupshon komo nan problema prinsipal.


Den un enkuesta, siudadanonan den 42 pais na Europa i Asia Sentral a bisa ku nan kere ku korupshon, ta un problema ku no a logra solushoná.

Ocho di kada dies spañó a rekonosé ku Prome Minister Mariano Rajoy, no ta kombatí e bisio sosial manera mester ta, asina a sali den un informe di e organisashon Transparencia Internacional España. Mas aleu e informe ta bisa ku 67 porshentu di spañónan ta pensa ku korupshon ta un di e problemanan mas grandi ku ta kastigá e pais. Den e informe, Transparencia Internacional España a públika resultadonan di e Barómetro Global di korupshon den 2016.

Di e 42 paisnan di Europa i Asia Sentral ku a partisipá den e enkuestanan, unu di kada 3 siudadano ta afirmá ku korupshon i soborno ta e problema mas grandi den nan pais. Entre 65 pa 67 porshentu di e kosovarnan (Repúblika di Kosovo), spañónan i moldavionan (Moldavia) ta pensa ku nan gobièrnunan mester atendé korupshon ku e prioridat nesesario. Na Spaña un 3 porshentu di e pueblo ta atmití di a yega di paga soborno pa hasi uzo di alomenos 1 di e 8 servisionan públiko ku tabata indiká den e enkuesta. 35 porshentu di e spañónan enkuestá ta pensa ku tin un miedu pa posibel konsekuensha negativo, si nan denunsiá korupshon. Di otro banda, 19 porshentu di spañónan ta aseptá korupshon komo algu normal, segun e informe.