MAN a anunsiá su kandidatonan pa Minister.


Den un deklarashon pa TeleNotisia di TeleCuraçao, lider di MAN, Hensley Koeiman a konfirmá ku el a keda apuntá den Konseho di Partido, pa bira e próksimo Promé Minister di Kòrsou. Ademas, Koeiman a konfirmá tambe, e rumornan ku tabata sirkulá, esta ku Eunice Eisden lo bira e Minister Plenipotensiario na Ulanda. Pa loke ta e kartera di Finansas, tambe tabatin basta spekulashon. Entre otro e nòmbernan di Gregory Damoen i Matroos Lasten a nómbra komo posibel kandidato pa okupa e kartera pa MAN. Sinembargo Konseho di Partido MAN den e dianan ku a pasa, a disidí ku ta Kenneth Gijsbertha lo bira Minister di Finansas. Ademas e partido a anunsiá tambe Elsa Roosendal komo minister di Enseñsa. Segun Koeiman ainda partido no a tuma un desishon riba ken lo bira Presidente di Parlamento. Último dianan a sali den prensa ku e posiblidat ta grandi ku Parlamento lo por haña un hende muhé komo Presidente. Konsiderando e kandidatonan ku ya MAN a anunsiá, ta keda Giselle McWilliam pa e puesto, den kaso ku ta un hende muhé. Di otro banda tin e nòmber di Gassan Danawi, tambe ku ta menshoná komo posibel kandidato pa Presidente di Parlamento. Otro partidonan no a konfirmá públikamente ken ta nan kandidatonan, pero ya tin vários nòmber riba kaya. Pa PAR, Eugene Rhuggenaath i Zita Jesus-Leito lo bira Minister, pa Pueblo Soberano, Jaime Cordoba i Ruthmilda Larmonie-Cecilia i pa Partido Nashonal tin papiá ku Ornelio “Kid” Martina lo por bira e próksimo Minister di Hustisia i Humphrey Davelaar komo Minister di VVPR. Despues di dos siman, lo sa kuá ta e Ministernan ku a pasa “screening” pa okupá un puesto den Gabinete Koeiman.