Den e oranan tras di lomba, basta awa a kai na Aruba i kousa molèster i inundashon na hopi parti di e isla. Na vários parti outonan tabata praktikamente bou di awa. Tabatin kaso di hendenan ku a keda pegá den outo, rondoná pa awa. Kuranan di kas ku a yena, pone ku habitantenan no por a sali nan kas. Outoridatnan ta vigilá e situashon di damnan na Aruba, ku lo por kibra un ora pa otro. A hasi un yamada na pueblo pa alehá di e damnan i áreanan inundá. Mientras tantu Meteo na Kòrsou tambe a saka un boletin di alerta pa mas awa den e próksimo oranan. BOLETIN SPESIAL # 01 : ALERTA PA WELEK KU BOS SEVERO
Dia emití : Djadumingu 20 di novèmber 2016, 10:30am ESAKI TA UN ALERTA PA WELEK KU BOS SEVERO PA HINTER KÒRSOU
Imágen di sátelite I radar ta mustra un área di bos ku welek severo ku ta menasá sierto partinan di Kòrsou.
IMPAKTO :
Áwaseru fuerte ku por kousa inundashon i/òf derumbe di tera i baranka den sierto parti di e isla. Bientu fuerte ku por pone ophetonan lòs bira un proyektil. Área bou di e nubianan di welek ku bos por ser kompañá pa bahamentu fuerte di aire. E bientu fuerte aki por kousa lokalmente sierto destrukshon riba su ruta.
MEDIDA DI PREKOUSHON:
Mara ophetonan ku ta lòs pafó i pone bo mes i bo bestianan di kas den seguridat. No usa un depósito chikitu ni palunan aislá pa skonde. No pasa dor di kayanan òf áreanan inundá, kaminda awa ta kuri. Sali for di boto i alehá bo mes for di awa, si esei ta posibel. Saka stèker di aparatonan elektróniko afó i no hasi uso di esakinan durante di un evento di welek ku bos. Usa telefon solamente den kaso di emergensia.