Te ku awor a registrá 15 kaso di e sindrome di Guillan-Barré na Kòrsou. Den un di e kasonan ta trata di un asosiashon ku Zika. Esaki ta loke e epidemologo Izzy Gerstenbluth a deklará. Tin un subida den kantidat di kasonan, pero den pasado a yega di surgi mas di e kasonan aki. E kantidat mas haltu tabata na 2008, kaminda a registrá 17 kaso na Kòrsou. E sindrome di Guillan-Barré ta un enfermedat di e sistema nervioso. Ta trata di un reakshon auto-imun kompañá pa infekshonnan viral manera por ehèmpel grip òf zika. Normalmente ora un hende keda infektá pa un bakteria òf vírus e sistema imun ta krea un defensa pa asina kombatí e esakinan. Serka sierto hende, e defensa mes ta kuminsá ataka e sistema imun paso e defensa ta mira e proteina di e sélulanan komo e vírus òf e bakteria. Esaki ta kondusí na ku e sistema nervioso ta bira suak den áreanan di brasa, pia i kara. E vírus ta trese kuné entre otro ku kurpa ta tintel i ta pèrdè heful den pia i brasa, pero tambe problema ku kanamentu, problema pa guli, spirnan suak, problema ku respirashon, pèrdida di reflèks i spirnan ku ta bira lam. Den kasonan ekstremo e sindrome por kondusí na un koma òf asta morto. Un di e pashèntnan aktual ta di Sint Maarten paso einan no tin neurologo. Aña 2016 no a kaba ainda pues ta di mira si ta bin mas kaso aserka. A menshoná ku ta trata di un kantidat haltu, paso normalmente ta registrá 1.5 te 2 kaso pa aña kalkulá riba 100.000 habitante. Awor ku ya tin 15 kaso registrá ta un oumento signifikante. Den sifranan apsoluto esaki por mustra tiki pero e impakto di e sindrome riba hende ta grandi.