Bou di Presidente Temer, gastunan di gobièrnu na Brazil a oumentá den seis luna.


Brasileñonan a rechasa e enmienda konstitucional pa limitá e gastu públiko den sektornan manera salú i edukashon pa 20 aña. Miéntras presidente Michel Temer ta ofresé un sena luhoso na senadornan, pa buska aprobashon di e enmienda konstitushonal (PEC), ku ta pèrmitié pa vris e presupuesto i limitá gastu públiko pa 20 aña, sentenáres di brasileño a protestá den kayanan kontra e medida neoliberal. E manifestantenan a será e kaminda ku ta kondusí na palasio di La Alvorada, ku ta sede di Gobièrnu. Nan a hasi esaki pa impedí e sena di Presidente Temer ku e senadornan. Na luna di mei, Temer a anunsiá ku e lo buska aprobashon pa un enmienda konstitushonal, pa limitá invershon públiko i rekuperá ekonomia dje pais. Na òktober, e Kámara di Diputadonan na Brazi a aprobá, den di dos ròndu, e proposishon di e mandatario.

Sindikalistanan i organisashonnan sosial ta denunsiá ku e resolushon lo vris e invershonnan di Estado den sektornan i organisashonnan sosial. Prinsipalmente den sektornan primordial manera salú i edukashon. Tambe nan ta señalá ku e enmienda konstitushonal ta limitá e oumentu di gastunan públiko na e tasa di inflashon di e aña anterior. Esaki práktikamente ta vris e invershonnan di Estado, ku konsekuensia ku lo no tin kresementu real den e próksimo 20 aña. Michel Temer a asumí presidensia na Brazil, via un gòlpi di estado parlamentario, kontra e mandatario legítima, Dilma Rousseff, ku a keda eligí demokrátikamente pa mas di 50 mion brasileño.