Parlamento di Kòrsou konosé te awor sinku miembro independiente.


Despues ku den e dianan tras di lomba, parlamentario Eduard Braam a kibra ku frakshon di PAR i posishoná su mes komo miembro independiente den parlamento, e ta bira di 5 miembro independiente den Parlamento for di momento ku Kòrsou a bira pais. Den parlamento di periodo 2012 – 2016 esei a pasa kuater bia. Pa e parlamento nobo ku a huramentá den apenas algun dia ya un kaso similar a tuma lugá. Na aña 2012 Glenn Sulvaran a kibra ku frakshon di PAR i duna su sosten komo miembro independiente na e koalishon di PS, PAIS i PNP. Huntu e frakshonnan akí tabatin 11 di e 21 asientonan. Un aña despues Omayra Leeflang a kibra laso ku frakshon di PAR komo protesta pa nombramentu di Daniel Hodge komo lider di PAR. Leeflang no por a aseptá ku a nombra Hodge komo lider di partido, siendo ku e la sinta komo promé minister pa PS. Entre tantu Leeflang ta lider di partido Un Kòrsou Hustu, ku kuá el a optené un asiento den elekshon di 5 di òktober. Na aña 2015 Marilyn Moses a kibra ku partido PAIS pa motibu di malkontentu riba maneho di gobièrnu. Moses tambe a logra saka un asiento den último elekshon ku su partido Movementu Progresivo. Na kuminsamentu di 2016 tabata Charles Cooper, eks lider di MAN ku a kibra laso ku e partido blou. Cooper tambe a sigui komo miembro independiente. Cooper tambe a partisipá ku su propio partido PAS den elekshon, pero no a logra saka asiento. Awor algun dia despues di huramentashon den parlamento pa temporada 2016-2020, Eduard Braam ta kibra ku frakshon di PAR pa motibu di deskonfiansa mutuo i malkontentu pa e hecho ku e no a bin na remarke pa e puesto di minister di Salubridat, Medioambiente i Naturalesa.