IS a destruí siudat istóriko Nimrud.


Estado Islámiko (IS) a destruí e siudat istóriko Nimrud, práktikamente kompletu. Dos dia despues ku a logra saka e teroristanan for di e siudat, a bin ripará kon Estado Islámiko a kousa un destrukshon enorme. E siudat antíguo Asiria, ku un tempu tabata kapital di e nashon, ta den ruina. Asina BBC ta raportá. Anteriormente tabatin imágen di kombatiente-IS, ku tabata destruí monumento i edifisionan istóriko den e siudat, pero ta awor numa ku a saka IS for di e siudat, a bira realmente visibel kon grandi e destrukshon ta. Ku material pisá i buldozer a redusí gran partinan di e siudat istóriko na pida pida restunan di blòki. "Bo por a imaginá bo mes kon bida tabata aki antes i awor no tin nada mas," asina Ali al-Bayati, lider di un milisia ku a lucha kontra IS, a bisa. “E pèrdida di Nimrud ta mas pisá pa mi, ku destrukshon di mi propio kas,” al-Bayati a splika.

Nimrud, un tempu tabata un di e siudatnan prinsipal den Medio Oriente. Reinan di e Reinado Asíriko tabata trahá palasio- i monumentunan einan. For di 1950, e siudat antiguo, tabata haña bishita di arkeólogonan for di tur parti di mundu. Hopi imágen for di Nimrud ta eksponé den museonan rònt mundu, pero awor ya e konstrukshonnan ei no tei mas. Na 2014, na momentu ku IS a drenta Nimrud, e edifisionan tabata tei ainda. IS ta mira arte i arkitektura di Islam komo diosnan falsu i por lo tanto mester keda destruí.

E organisashon di Herensia Mundial Unesco, a desaprobá e destrukshonnan i a kalifiká esaki komo un krímen di guera. Segun Unesco, IS ta klaramente determiná pa kita tur memoria di pasado for di e pueblo Irakí. E re-konkista di Nimrud, ta parti di un operashon grandi di e ehérsito irakí pa asina por logra haña Mosul den nan poder. Mosul ta situá na 30 km na nòrt di Nimrud i te ainda ta den mannan di IS. Dia 17 di òktober último, e trupanan irakí a kuminsá ku kontra ofensivo.