Hopi awaseru na Kòrsou den novèmber.


Den e dianan ku a pasa, Kòrsou a konosé un palu di áwaseru na vários sitio. Manera kustumber e área di Otrobanda tambe a haña hopi awa ku a kousa molèster. Banda di Sehos (hòspital) tabatin outonan ku a keda pegá den e awa. A surgi un situashon kaminda tabata difísil pa outonan por a move ku fasilidat di un banda pa otro.

Sifranan di Meteo ta bisa ku den luna di òktober a kai 36.9mm di áwaseru. Esaki ta un averahe di 64% ménos ku den añanan anterior. For di kuminsamentu di 2016 te ku fin di òktober a kai 152.6mm di áwaseru. E temperatura averahe den òktober tabata 29.4 grado Celsius, kompará ku un averahe normal di 33 grado Celsius. Luna di òktober tabata mas friu ku normal. E temperatura di mas altu ku a mii ta 35.8 grado Celsius riba 3 oktober masomenos mitar di dos di mèrdia. E temperatura mas abou tabata 23.3 grado Celsius, ku a midi dia 19 di òktober banda di 12or di mardugá.