Durante e programa “60 minutes” riba e kanal di televishon CBS, presidente elekto Donald Trump, a bolbe bisa ku e tin tur intenshon pa lanta e muraya na frontera ku México. Na algun parti, un muraya ta e mihó solushon, pero aki aya lo por pone un hèki tambe. Mexico a bisa ku nan lo no kontribuí pa traha e muraya, pero esei no ta intresá Trump. Ademas, manera e keda instalá komo presidente, Trump tin intenshon pa deportá imigrantenan ilegal. Ta trata di masomenos dos pa tres mion hende. “Loke nos ta bai hasi ta, deportá kriminalnan o hendenan ku tin un pasado kriminal. Esnan ku ta forma parti di gèng o ta trafika den droga, mester bai será o sali pafó. Nan ta ilegal,” asina e presidente elekto a deklará durante e entrevista. Despues ku nos sera frontera, mesora outoridatnan di imigrashon lo kuminsá mira kiko ta bai pasa ku e personanan indokumentá. Pero promé ku tur kos, mester segurá e frontera di Merka, segun Trump.