Rusia a spanta supmarino ulandes den laman Mediteráneo.

Un barku marino di Rusia a spanta un supmarino ulandes den laman Mediteráneo, ora ku e supmarino a yega muchu serka di barkunan ruso. E Ministerio di Defensa di Rusia a papia di un maniobra peligroso, ku por a resultá den un desgrasia grandi, asina agensia di prensa di estado ruso RIA Novosti a publiká. E barkunan di marina ruso a deskubrí un supmarino ulandes di e klase Walrus. E supmarino ulandes por vigilá e movishonnan di e barku portavion Kuznetsov for di un distansia di 20 kilometer. E sistemanan di sonar di e supmarino Severomorsk i helikopternan militar a deskubrí e supmarino ulandes. Segun agensia di prensa TASS, a obligá e ulandesnan pa bandoná e teritorio den laman.

Ministerio di Defensa ulandes a bisa ku nan lo no duna niun deklarashon tokante operashonnan ku supmarinonan ulandes ta hasi. "Esei nos no ta hasi nunka," segun un bosero. E portavion ruso tabata nabegá den laman Mediteráneo pa ataká sierto blankonan na Siria. Rusia tin un base militar den e siudat sirio, Tartus. Rusia a anunsiá di lo bombardiá unidatnan terorista rondó di Aleppo. Rusia ta pretendé ku nan a yega di señalá supmarinonan di e miembro di NAVO den laman Mediteráneo. Rusia a bisa tambe ku nan a mira e supmarino nuklear merikano, Virginia den e area.