Den e siman tras di lomba, e revista Glamour a públika ku e lider di U2, Bono ta forma parti di nan lista di Hende Muhé di Aña, huntu ku otro muhénan ku a destaká, manera entre otro e kantante Gwen Stefani i Simone Biles, ku a gana medayanan olímpiko. “Mi tin sigur ku mi no meresé,” asina Bono a bisa Glamour ora ku nan a poné na altura di e rekonosementu. “Mi ta gradesido pa e premio akí i ta un oportunidat pa mi bisa ku e lucha pa igualdat di género no por ser ganá a ménos ku e hende hòmber hib’é huntu ku e hende muhé. Nos ta responsabel pa gran parti dje problema, ke men nos mester ta involukrá den e solushonnan,” el a sigui bisa.
Según AP, e hefe di redakshon di Glamour, Cindi Leive, a deklará ku nan a diskutí e asuntu mas ku un biaha. “Pa añanan largu nos a papia ariba si nos tin ku honra un hende hòmber riba e lista di Hende Muhé di Aña i semper nos a duda. Hende hòmber ta risibí hopi premio,” asina el a splika.
Despues a bin e hustifikashon pa nombramentu di e kantante di U2 riba e lista. ”A parse nos bon idea pa kibra ku e forma antikuá pa wak kosnan i tin tantu hende hòmber hasiendo kosnan fantástiko pa hende muhé i Bono ta un di nan,” Leive a bisa. Glamour a publiká di kon el a tribi di premia Bono komo Hende Muhé di Aña. Nan a menshoná un seri di akshonnan i inisiativanan kaminda e kantante a faboresé tantu hende hòmber komo hende muhé na mundu.
“Awe, 17 mion hende na Áfrika, den sur di Sahara, ta haña remedi pa AIDS ku ta salba nan bida. Promé ku esaki e kantidat na aña 2000 tabata 300.000 i e adelanto pa gran parti ta danki na e trabou di Bono i ONE. ONE ta e organsisashon internashonal di boluntarionan ku Bono a yuda funda na 2004,” asina Christian Amanpour, koresponsal internashonal di CNN, a skibi pa Glamour. Amanpour tambe a gana e premio na 2005.
Bono a bende mas di 70 mion álbum, gana 22 premio Grammy i a duna mas di 100.000 mion dòler pa paga deuda eksterno di 35 pais den nesesidat. El a krea e kampaña “Poverty is Sexist”, ku intenshon di yuda spesífikamente e hende muhénan mas pober na mundu.