Polis a detené 198 hende durante yegada di Sanikolas na Ulanda.


A sobra ún manifestante ku ainda ta detené despues di e protestanan ku a surgi na yegada di Sanikolas na Ulanda. Polis na Rotterdam a detené sigur 198 manifestante, pero a laga praktikamente tur bai. Esun ku ta detené ainda, lo mester a purba pusha un reportero di PowNed dilanti di un outo. Manera tabata e kaso den añanan anterior, tabatin basta protesta na Rotterdam ku yegada di Sanikolas. Polis a prohibí e manifestashonnan na sierto areanan, debí ku tantu e grupo ku ta pro Sanikolas, komo esnan ku ta kontra e fiesta, lo a plania akshonnan na yega di hòmber Santu. Entre e detenido tabatin e abogado Michiel Pestman, aktivista Jerry Afriyie i miembro di e partido Groen Links Simon Blom. Wethouder di Rotterdam, Aboutaleb a saka un atvertensia e anochi promé, debí na informe ku e gruponan di protesta di ambos banda lo bini sentro di Rotterdam na lugá di bai Maassluis. Polis mester a atendé ku e grupo Kick Out Zwarte Piet, pasó nan kier a subi riba Erasmusbrug. Un parti chikí di e grupo a logra pasa e barikada di polis tòg i a logra manifestá den besindario di e brùg. Outoridatnan a prohibi e demostrashonnan na Rotterdam, debí ku no tabatin sufisiente polis. Mayoria polis mester a bai Maassluis pa yegada di Sanikolas.