Komité Olímpiko Internashonal ta bai repartí 500 mion dòler.

Den e próksimo kuater añanan, Komité Olímpiko Internashonal (IOC) ta bai repartí 500 mion dòler entre e federashonnan olímpiko nashonal. E plaka ta destiná entre otro pa sostené refugiadonan ku ta praktiká deporte na nivel haltu. IOC por hasi esaki, debí ku e organisashon olímpiko a hasi hopi ganashi ku benta di derechinan di transmishon pa e Weganan di Verano na Rio (2016) i e Weganan di Invierno na Pyeong-chang (2018). E kontribushon akí na e federashonnan, for di e asina yamá Fondo di Solidaridat, ta 16% mas haltu ku den e siklo olímpiko anterior. “E éksito enorme di e Weganan Olímpiko na Rio, ta nifiká ku e organisashon olímpiko ta den un situashon finansiero saludabel i esei ta pone nos den e posishon di por repartí mas ku mei bion di dòler den e kuater añanan benidero,” asina Pere Miró, direktor di e Fondo di Solidaridat, a deklará.