Kòrsou ta haña 900.000 florin na dekorashon di Pasku, Fiesta di Lus.


Aqualectra a kuminsá trese Kòrsou den ambiente di Pasku ku dekorashon di lus na vários sitio rònt Kòrsou. E proyekto, Pasku, Fiesta di Lus di e Ministerio di VVRP (Tráfiko, Transporte i Planifikashon Urbano) i Aqualectra ta kosta 900.000 florin. Aqualectra ta pidi komunidat pa yuda kuida e dekorashonnan di pasku. Ta e intenshon pa sigui uza e dekorashonnan aki den futuro.

E dekorashon di pasku e aña aki ta un diseño di Kara Productions i téknikonan di Aqualectra. A krea tur e dekorashonnan na Kòrsou mes. Lo bin lusnan dekorativo den Punda i Otrobanda, Parke Wilhelmina, Waaigat, plenchi dilanti Palasio di Gobernadó, na diferente rotònde manera por ehèmpel esun di Lucina da Costa Gomez i esun di Ergilio Hato, na Viadukto Otrobanda, Brùg di Ponton, Brionplein i na Pater Euwensweg. Banda di e sitionan aki lo dekorá i iluminá tambe e krusada di F.D Rooseveltweg ku Jan Noorduynweg i Winston Churchillweg, Caracasbaaiweg i e rotòndenan di Janwe, Sehos, Zuikertuintje i Zegu. Pa yuda gobièrnu ku e proyekto, Curacao Tourist Board i Aqualectra tambe a partisipá ku nan aporte finansiero.

Ta e intenshon pa sende e lusnan ku un selebrashon spesial riba djaweps 24 di novèmber. E iluminashon di Pasku aki lo benefisiá sektor komersial i lo ta un atrakshon èkstra pa e sektor turístiko, segun Aqualectra den un komunikado.