Durante un evento pa esnan ku a hasi donashon na e kampaña di e demokratá Hillary Clinton, el a akusá FBI di ta outor di su derota den e kontienda elektoral pa presidensia di Merka. Asina dos testigu ku tabata presente a indiká. No opstante ku Clinton a haña mas voto, Donald Trump a gana elekshon na Merka dia 8 di novèmber último. Masomenos ún siman promé ku elekshon, e direktor di FBI, Comey a manda un karta pa Parlamento, pa notifiká ku e buró lo habri e investigashon tokante e i-meilnan di Hillary Clinton di nobo. Tabata trata di i-meilnan ku no tabata konosí pa FBI den nan investigashon anterior. Un siman despues, Comey a splika ku nan a konkluí e investigashon i no a haña nada partikular. Según Hillary, su kampaña a sufri basta daño, ku e deklarashonnan di FBI. Ademas Donald Trump a hasi bon uso di esaki pa ataké. E repúblikano Comey, a aktua kontra deseo di e minister di Hustisia merikano, Loretta Lynch, na momentu ku el a hasi e anunsio. Lynch a bisa ku e ministerio di Hustisia no ta hasi deklarashon públiko, nèt den porta di elekshon i ku por tin reperkushon pa resultado di elekshon.